नेपालगन्ज, माघ १५- प्रादेशिक महोत्सव २०८१ को छैटौं दिन मंगलबार चर्चित लोकदोहोरी गायक कमल बिसी माल्दाईको धमकादार प्रस्तुतीमा दर्शकहरु नाँचेका छन् । पछिल्लो बर्षमा चर्चाको शिखरमा लोकदोहोरी गायनमा फरक प्रस्तुती दिदै आएका गायक विसीले आज नेपालगन्ज महोत्सवमा दर्शक नचाए । उनका आधा दर्जन चर्चित गीतमा हजारौ दर्शक झुमेका थिए । मेलाको सुरुमा गायक कमल बिसी माल्दाइ डोरी बाटेर गीत गाउँदै स्टेज उक्लिएका थिए ।

उनले झन्डै आधा दर्जन गीतहरू गाएर दर्शकहरुलाई झुमाएका थिए । यस्तै  गायिका एलिना चौहान लगायतका कलाकारहरुले बेजोड प्रस्तुति रहेको थियो । गायिका एलिना चौहान, गायक कमल बिसी माल्दाइ, डान्सर तथा मोडल रुबिना अधिकारी, गायक राज कुश्मी लगायतका कलाकारहरु महोत्सवमा आएका थिए ।  स्थानीय कलाकारहरुको प्रस्तुति सकिएलगत्तै राष्ट्रिय कलाकारहरुले प्रस्तुति दिएका थिए । कमलको प्रस्तुति सकिएपछि डान्सर रुविना अधिकारीले पनि आधा दर्जन गीतमा आफ्नो नृत्य प्रस्तुत गरेकी थिइन् । त्यस्तै, मंगलबारको हट केक मानिएकी गायिका एलिना चौहानको प्रस्तुतिमा त दर्शकहरु अति नै झुमेका थिए । उनले ‘यो भाग्यमा खोट छु... धोकेबाज..., कट्टा हान्दिन्छु...मिनरल वाटर..लगायतका लोकप्रिय गीत गाउँदा दर्शकहरुले पनिसँगै गाएर नाच्दै साथ दिएका थिए ।

राष्ट्रिय कलाकारहरुको रुपमा अन्तिम प्रस्तुति चाहिँ चर्चित थारु गायक राज कुश्मी स्टेज उक्लिएका थिए । उनले पनि आफ्ना चर्चित गीतहरू गाएर मनोरञ्जन प्रदान गरेका थिए । उनले झन्डै डेढ घण्टा आफ्नो प्रस्तुति दिएका थिए ।